၂၀၀၃ ခုနှစ် မေလ ၃၀ ရက်တွင် ဒီပဲယင်းလူသတ်မှု အဖြစ်အပျက်ကို ရေးသားထားခြင်းဖြစ်သည်။ ထိုအဖြစ်အပျက်အပြီး ထင်ရှားလာသည့် အခေါ်အဝေါ် အသုံးအနှုန်းတစ်ခုမှာ "စွမ်းအားရှင်" ဟူသည့် အမည်နာမ ဖြစ်သည်။ ၂၀၀၇ ခုနှစ်တွင် ကွယ်လွန်သွားခဲ့သည့် ဝန်ကြီးချုပ် ဦးစိုးဝင်း၏ အထ္ထုပတ္တိတွင် "စွမ်းအားရှင်" ဟူသည်ကို တစ်စွန်းတစ်စ လှစ်ဟပြခဲ့သော်လည်း မည်သူမည်ဝါ၊ မည်သို့သော အဖွဲ့အစည်း၊ မည်သည့်အာဏာရှိသည် ဟူသည်ကိုမူ ရေးသားထားခြင်းမရှိပါ။
စစ်အုပ်ချုပ်ရေးလက်အောက် ၂၀၀၀ ပြည့်လွန်နှစ်များအတွင်း အလွန်ရေပန်းစား တန်ခိုးထွားခဲ့သည့် "စွမ်းအားရှင်" တို့ ပါဝင်ပတ်သက်ခဲ့သည်ဟု ယုံကြည်ရသော ၂၀၀၃ မေ ၃၀ ဒီပဲယင်း အဖြစ်အပျက်တွင် လူပေါင်း ၆၀ ကျော် အသက်ဆုံးရှုံးနိုင်သည်ဟု ခန့်မှန်းချက်များ ထွက်ပေါ်လာခဲ့သော်လည်း ဗိုလ်ချုပ်ကြီးစိုးဝင်း၏ အတ္ထုပတ္တိတွင်မူ လေးယောက်သေဆုံးပြီး ၇၀ ကျော် ဒဏ်ရာရသည်ဟု ဆိုထားသည်။
ဒီပဲယင်းအဖြစ်အပျက်နှင့် ပတ်သက်၍ "ဘယ်နေရာကမှန်းမသိ အသံကြားလိုက်ရပြီး ရိုက်ကြ၊ နှက်ကြဖြစ်သွားပါတယ်၊ မှောင်နဲ့ မည်းမည်း မြင်သမျှ ရိုက်ကြသလိုဖြစ်သွားပါတယ်၊ လူအုပ်ကလဲ ပြေးတဲ့သူက ပြေးဆိုတော့ အလဲလဲ အကွဲကွဲ ဖြစ်ကုန်ကြပါတယ်" လွန်ခဲ့သော ၁၂ နှစ်ခန့်က ပေါ်ပေါက်ခဲ့သည့် ဒီပဲယင်းအဖြစ်အပျက်ကို ဦးစိုးဝင်း၏ အတ္ထုပတ္တိတွင် ရေးသားထားခြင်းဖြစ်သည်။
ဒီပဲယင်းအဖြစ်အပျက်တွင် သေဆုံးသည့် လူဦးရေ အရေအတွက်ကွဲပြားချက်များ ရှိခဲ့သော်လည်း "စွမ်းအားရှင်" များ ပါဝင်ပတ်သက်ခဲ့သည် ကိုမူ ငြင်းဆို၍မရနိုင်ကြောင်း အဖြစ်အပျက်ကို ကိုယ်တွေ့ကြုံခဲ့ရသည့် အမျိုးသားဒီမိုကရေစီအဖွဲ့ချုပ် နာယက ဦးတင်ဦးက မီဒီယာများသို့ အကြိမ်ကြိမ် ခိုင်ခိုင်မာမာ ပြောဆိုခဲ့သည်။
ဒီပဲယင်းအဖြစ်အပျက်အပြီး လေးနှစ်အကြာ ၂၀၀၇ ခုနှစ် စက်တင်ဘာလအတွင်း ပေါ်ပေါက်ခဲ့သည့် ရွှေဝါရောင်တော်လှန်ရေး ကာလတွင်လည်း အဆိုပါ "စွမ်းအားရှင်" ဟူသည့် အသုံးအနှုန်း ပြန်လည်ခေါင်းထောင်လာခဲ့ပြန်သည်။ ရွှေဝါရောင်ကာလအတွင်း ဆန္ဒပြသူများကို အရပ်ဝတ် "စွမ်းအားရှင်" ဆိုသူများက ဖမ်းဆီးချုပ်နှောင် အချုပ်ကားများပေါ်သို့ ရုပ်ပျက်ဆင်းပျက် ဆွဲတင်ဖမ်းဆီးခဲ့သည့် ဖြစ်ရပ်များ ပေါ်ပေါက်ခဲ့သည်။ သို့သော် ဆိုခဲ့သော "စွမ်းအားရှင်" ဆိုသူများ မည်သူမည်ဝါ၊ မည်သည့်အတွက်ကြောင့် ဤကဲ့သို့ လုပ်ဆောင်သည်၊ မည်သို့သော အခွင့်အာဏာရှိသည်၊ ဥပဒေနှင့် ညီညွတ်သည် မညီညွတ် ဟူသည်ကိုမူ တိပသည့် ဖြေရှင်းချက်များ ထွက်မလာခဲ့ပါ။
၂၀၀၀ ပြည့်နှစ်အလွန်နှစ်များမှ စတင်ရေပန်းစလာသည့် "စွမ်းအားရှင်" များသည် ဒီမိုကရေစီ အရပ်သားအစိုးရဟု ခေါ်ဆိုကြသည့် ဦးသိန်းစိန်အစိုးရ လက်ထက် ၂၀၁၅ ခုနှစ် မတ်လတွင် ပြန်လည်ပေါက်လာပြန်သည်။ အမျိုးသားပညာရေး ဥပဒေကို ပြင်ဆင်ပေးရန် ကျောင်းသားများ ဆန္ဒပြမှုကို ထိန်းသိမ်းရန်ဟူသည့် အကြောင်းပြချက်ဖြင့် ပြန်လည်ပေါ်ပေါက်လာခြင်းဖြစ်သည်။
မတ်လ ၅ ရက် မြို့တော်ခမ်းမရှေ့တွင် ဆန္ဒပြရန် ပြင်ဆင်နေသည့် ကျောင်းသားများကို လက်ပတ်နီဝတ်ထားသူများ သို့တည်းမဟုတ် "စွမ်းအားရှင်" ဟု ခေါ်နိုင်သည့် အရပ်သားများက ဝိုင်းဝန်းဖမ်းဆီးကြခြင်းဖြစ်သည်။ ဖမ်းဆီးထိန်းသိမ်းမှုသည် နိုင်ငံဂုဏ်ဆောင် သမိုင်းဝင် မြို့တော်ခမ်းမရှေ့တွင် ရုပ်ပျက်ဆင်းပျက် ပေါ်ပေါက်ခဲ့ခြင်းဖြစ်သည်။
မြို့တော်ခမ်းမရှေ့ အဖမ်းခံရမှုနှင့်ပတ်သက်၍ ၈၈ မျိုးဆက်ကျောင်းသားခေါင်းဆောင် မင်းကိုနိုင်က မေးခွန်းထုတ်လိုက်ပြီး ဤကဲ့သို့ ဖမ်းဆီးရန် စေခိုင်းအမိန့်ပေးသူကို ဖေါ်ထုတ်ပေးရန် မတ်လ ၅ ရက်ညပိုင်း သတင်းစာရှင်းလင်းပွဲတွင် တောင်းဆိုလိုက်သည်။ "ဒီလိုအကြမ်းဖက် ဖြိုခွင်းနည်းတွေကို ကျွန်တော်တို့ လက်မခံနိုင်ဘူး။ စေခိုင်းနေသူကို ဖော်ထုတ်ပေးဖို့ အစိုးရနဲ့ လွှတ်တော်ကို တိုက်တွန်းသွားမယ်” ဟု မင်းကိုနိုင်က ဆိုသည်။ “တာဝန်ဆိုတဲ့ အနီရောင်လက်ပတ်ကို ပတ်လိုက်ရင် ဘယ်သူမဆို မိန်းမပျိုတစ်ယောက်ကို ချုပ်နှောင်ခွင့်ရပြီလား၊ ဘယ်သူတွေက သူတို့ကိုတာဝန်လို့ အပ်နှင်းလဲ” ဟုလည်း မင်းကိုနိုင်က ထပ်မံ မေးခွန်းထုတ်ခဲ့သည်။
၈၈ မျိုးဆက် အခြားကျောင်းသားခေါင်းဆောင်တစ်ဦးဖြစ်သူ ကိုကိုကြီးကလည်း ဤကဲ့သို့ အရပ်သမားများမှ ဆန္ဒပြသူများကို ဖမ်းဆီးခဲ့ခြင်းသည် ယခင်စစ်အစိုးရ လက်ထက်ကသို့ "စွမ်းအားရှင်" များဖြင့် ဖြေရှင်းသည့် ပုံစံဖြစ်နေသည်ဟု ဆိုကာ "စွမ်းအားရှင်တွေနဲ့ဖြေရှင်းတဲ့ ပုံစံမျိးကို ဘယ်သူက ဦးဆောင်ပြီး တာဝန်ပေးသလဲ အဲဒါကို ဖော်ထုတ်ဖို့လိုပါတယ်။ တာဝန်ခံဖို့လိုပါတယ်" ဟု ဆိုခဲ့သည်။
ဆန္ဒပြသူများကို အရပ်ဝတ် "စွမ်းအားရှင်" များက ဖမ်းဆီးမှုနှင့်ပတ်သက်၍ မည်သူက တာဝန်ပေး စေခိုင်းသနည်း၊ ထိုသူတို့သည် မည်ကဲ့သို့ အာဏာရှိသည်၊ မည်သည့် တာဝန်ထမ်းဆောင်နိုင်သည်ဟူသည့် မေးခွန်းများနှင့် ပတ်သက်၍မူ သမ္မတ၏ ပြောရေးဆိုခွင့် ရှိသူလည်းဖြစ်၊ ပြန်ကြားရေး ဝန်ကြီးလည်းဖြစ်သူ ဦးရဲထွဋ်က "သက်ဆိုင်ရာ တိုင်းအစိုးရအဖွဲ့တွေက လုပ်တာပါ။ ပြည်ထောင်စု အစိုးရအဖွဲ့က လုပ်တဲ့ဟာ မဟုတ်ပါဘူး။ ပြည်နယ်အစိုးရတွေကပဲ အဲဒီကိစ္စတွေကို ကိုင်တွယ်နေတာပါ" ဟု ဆိုသည်။
မတ်လ ၅ ရက် မြို့တော်ခမ်းမရှေ့ တွင် ဆန္ဒပြသူများကို ဖမ်းဆီးရာတွင် ရဲတပ်ဖွဲ့ဝင်တို့က ပုဒ်မ ၁၂၇၊ ၁၂၈ တို့ဖြင့် အရေးယူမည်ဖြစ်ကြောင်း အသိပေးခဲ့ကြသည်။ သို့ဆိုလျှင် ပုဒ်မ ၁၂၇ ကိုလေ့လာကြည့်ပါက ဒု-ရဲအုပ်အောက် အဆင့်မနိမ့်သည့် ရဲအရှိသည် "တရားဥပဒေနှင့် ဆန့်ကျင်သည့် အစုအဝေး တစ်စုံတစ်ရာကို သို့မဟုတ် အများပြည်သူတို့ ငြိမ်းချမ်းခြင်းကို နှောက်ယှက်ဖျက်ဆီးရန်ရှိသော လူငါးဦးဖြစ်စေ၊ ၎င်းင်းထက်ပို၍ဖြစ်စေ စုဝေးသည့် အစုအဝေး တစ်စုံတစ်ရာကို လူစုခွဲစေရန် အမိန့်ပေးနိုင်သည်" ဟု ပါရှိသည်
ပုဒ်မ ၁၂၈ တွင်မူ "မြန်မာနိုင်ငံ အရန်တပ် အက်ဥပဒေအရ လက်နက်ကိုင်မဟုတ်သူ မည်သည့်အမျိုးသားကိုမဆို အကူအညီတောင်းနိုင်သည်။ ထိုသူများကို အင်အားပြုလုပ်၍ လူစုခွဲရမည်" ဟု ဖေါ်ပြပါရှိသည်။
သို့သော် မတ်လ ၅ ရက် မြို့တော်ခမ်းမရှေ့ တွင် ဆန္ဒပြသူများကို ဖမ်းဆီးရာတွင် လက်ပတ်နီများဝတ်ဆင်ထားသည့် "စွမ်းအားရှင်" ဟု ယူဆနိုင်သည့် အမျိုးသားများက ဆန္ဒပြရာတွင်ပါဝင်သည့် အမျိုးသမီးများကို ဖမ်းဆီးချုပ်နှောင်မှုသည် ဥပဒေနှင့် ညီညွတ်မှုမရှိဟု ဥပဒေပညာရှင် ဦးသန်းထိုက်က ဆိုသည်။ " မနေ့က ဖြစ်စဉ်မှာ အမျိုးသမီးတွေကို ဖမ်းတယ်ဆိုရင် တကယ်တော့ အမျိုးသမီးရဲမေတွေကပဲ ဖမ်းရတာ" ဟုပြောသည်။
ပုဒ်မ ၁၂၇၊ ၁၂၈ ပြဋ္ဌာန်းချက်များပါရှိသည့် ဥပဒေဆန်းစစ်ကြည့်ပါက ၁၈၉၈ ခုနှစ် ကိုလိုနီခေတ်ကတည်းက ပြဋ္ဌာန်းခဲ့သည့် ဥပဒေတစ်ခု ဖြစ်နေသည်ကို တွေ့ရှိရသည်။ နှစ်အတိအကျ တွက်ကြည့်ပါမူ နှစ်ပေါင်း ၁၁၇ နှစ် ကြာမြင့်နေပြီဖြစ်သော အလွန်ဟောင်းနွမ်းနေသည့် ဥပဒေတစ်ခုဖြစ်သည်ကို တွေ့ရှိရသည်။
ထိုဥပဒေများကို မပြင်ဆင်ဘဲ ယနေ့ခေတ်အထိ ဆက်လက်အသုံးပြုနေခြင်းသည် ဖိနှိပ်မှုတစ်ခုသာဖြစ်သည်ဟု ဥပဒေပညာရှင် ဦးသန်းထိုက်က ရှုမြင်သည်။ "ဥပဒေတော်တော်များများဟာ ခေတ်နဲ့မညီတော့ဘူး အံဝင်ဂွင်ကျမဖြစ်တော့ဘူး၊ လူ့အခွင့်အရေးနဲ့ မညီတော့ဘူး ဥပဒေကို လွှတ်တော်က မပြင်နိုင်သေးတဲ့အခါ ဒီအတိုင်း ဆက်ပြီးတော့ ကျင့်သုံးနေတယ်၊ ကျိမ်းသေတာကတော့ ဒီဥပဒေတွေကို ခုချိန်ထိ ကျင့်သုံးတုန်းပဲ လူတွေကို ဖိနှိပ်လို့ ကောင်းတုန်းပဲ" ဟုပြောသည်။
၂၀၀၈ ဖွဲ့စည်းပုံအခြေခံဥပဒေ၏ နိုင်ငံသားများ၏ အခွင့်အရေးနှင့် တာဝန်များ အခန်းပါ ပြဋ္ဌာန်းချက်ပုဒ်မ ၃၅၄(ခ) တွင် "လက်နက်မပါဘဲ ငြိမ်းချမ်းစွာ စုဝေးခွင့်၊ စီတန်းလှည့်လည်ခွင့်" ရှိသည်ဟု ပြဋ္ဌာန်းထားသည်။ သို့ဆိုလျှင် နိုင်ငံတစ်နိုင်ငံအတွက် အလွန်အရေးကြီးသော၊ အခြေခံကျသော၊ မိခင်ဥပဒေဖြစ်သော ဖွဲ့စည်းပုံအခြေခံဥပဒေကို အမိန့်များ၊ ညွှန်ကြားချက်များ၊ ထုတ်ပြန်ချက်များ၊ တည်ဆဲဥပဒေများက ကျော်လွန်ပြဋ္ဌာန်း လုပ်ဆောင်ခွင့်ရှိပါ၏လော မေးခွန်းထုတ်စရာပင်ဖြစ်သည်။
မည်သို့ပင်ဖြစ်စေ နှစ်ပေါင်း ၁၀၀ ကျော်၊ ကိုလိုနီခေတ် အင်္ဂလိပ်နယ်ချဲ့လက်ထက်က ပြဋ္ဌာန်းခဲ့ပြီး ခေတ်နှင့်မလျော်ညီသော၊ အလွန်ဟောင်းနွမ်းနေပြီဖြစ်သော ဥပဒေများကို မပြင်ဆင်နိုင်ပါက၊ ထိုဥပဒေများကို အသုံးချလျက် လူ့အခွင့်အရေးချိုးဖေါက်မှုများ၊ လူ့အခွင့်အရေးနှင့် မညီသည့် လုပ်ဆောင်မှုများ၊ ဖြစ်ရပ်များ ဆက်လက်ဖြစ်ပေါ် နေနိုင်သည့်နည်းတူ လုပ်ပိုင်ခွင့်နှင့် တာဝန် မကွဲပြားသည့် "စွမ်းအားရှင်" ဟူသည့် လူတန်းစားတစ်ရပ်သည် ဆက်လက်တည်ရှိနေလိမ့်ဦးမည်။
မိဖုရား
Credit : Mizzima
0 comments:
Post a Comment